ERE licencon TAP në aktivitetin e transmetimit të gazit për 25 vjet
Enti Rregullator i Energjisë ka miratuar certifikimin përfundimtar të gazsjellësit Trans Adriatik si operator i pavarur i transmetimit të gazit natyror. Vendimi për licencimin është botuar ditën e enjte në ‘Fletoren Zyrtare’, sipas të cilit ERE ka vendosur të licencojë TAP AG Albania për një afat 25-vjeçar nga data e fillimit të operimit.
Referuar vendimit, shoqëria duhet të paraqesë pranë ERE jo më vonë se 12 muaj nga fillimi i operimit të gazsjellësit dokumentacionin e plotë që tregon titujt e pronësisë mbi asetet që ka për të kryer funksionet nën licencën e kërkuar në territorin e Shqipërisë.
TAP kishte paraqitur pranë ERE-s aplikimin për t’u pajisur me licencë në dhjetor të vitit të kaluar. Referuar vendimit, Gazsjellësi Trans Adriatik AG Albania rezulton i regjistruar pranë Qendrës Kombëtare të Biznesit si degë e shoqërisë së huaj aksionare (sh.a).
Gazsjellësi TAP me vlerë 4.5 miliardë euro është pjesë e Korridorit Jugor të Gazit, i cili është një nga projektet prioritare të energjisë për Bashkimin Europian.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.