ERE ‘rrëzon” OST-në për tarifat/ Operatori i Sistemit të Transmetimit kërkoi rritje, Enti: Kërkesa, e paargumentuar
Enti Regullator i Energjisë nuk do të shqyrtojë aplikimin e Operatorit të Sistemit të Transmetimit për rritjen e tarifës së transmetimit të energjisë për vitin 2021. OST kërkoi rritjen e kësaj tarife në 1.31 lekë/kWh nga 0.75 lekë/kwh që është për vitin 2020, por ERE ka vendosur të mos fillojë procedurën e shqyrtimit të aplikimit për shkak të mos argumentimit nga ana e OST mbi nevojën e kësaj rritjeje. Sipas Entit Rregullator, rritja e propozuar sipas OST është paraqitur pa informacione dhe dokumentacion, por vetëm në formë narrative, ndërsa është vlerësuar si rrjedhojë e pagesave të kredive që Shoqëria pret të ketë, investimeve të pritshme të cilat pret të mbulojë me fondet e veta si dhe rritjes së shpenzimeve që OST pret të ketë për vitin 2021 lidhur me shërbimet ndihmëse me hyrjen në fuqi të “Rregullave Të Tregut Shqiptar të Balancimit të Energjisë Elektrike”.
Po ashtu, konstatohet se OST nuk paraqiti një raporti mbi shpenzimet, të ardhurat dhe tarifat e aplikuara dhe realizuara si dhe efektet e tyre në pritshmërinë për vitin 2020, ku nga sa rezulton në aplikim është viti 2019, i cili tashmë është i mbyllur dhe OST sh.a. disponon të dhënat mbi realizimin e çdo treguesi financiar, teknik dhe ekonomik. Ndërsa, nga ana tjetër, shoqëria nuk ka paraqitur asnjë informacion lidhur me efektet e tarifës së propozuar kundrejt tarifës aktuale dhe impakti i saj në veprimtarinë e shoqërive të tjera që ushtrojnë aktivitet në sektorin e energjisë elektrike.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.