ESM, obligacion në dollarë – Planifikon emetimin e parë përtej euros në 2 muajt e ardhshëm

Mekanizmi Europian i Stabilitetit (ESM), që është fondi i shpëtimit i Eurozonës, pritet të shesë obligacionin e parë të denominuar në dollarë në muajin që vjen, tha kreu Klaus Regling. Regling shtoi se zgjerimi përtej emetimeve në euro do të ndihmojë mekanizmin që të tërheqë blerës të ri për borxhin.

“Diçka e re për tremujorin e fundi të këtij viti, mbase në muajin Tetor, është se ne do të emetojmë një instrument që nuk është denominuar në euro. Objektivi përfundimtar është të ulim kostot tona të financimit”, tha ai, duke shtuar se me një bazë më të gjerë të investitorëve, do të ketë reduktime të kostove.

ESM dhe paraardhësi, Faciliteti Europian i Stabilitetit Financiar (EFSF), janë krijuar gjatë krizës së borxhit të Eurozonës dhe kanë disbursuar deri më tani 272.5 miliardë euro në kredi emergjencë drejt Irlandës, Greqisë, Portugalisë, Qipros dhe Spanjës.

“Ne kërkojmë të ndihmojmë vendet huamarrëse për të rifituar qëndrueshmërinë e borxhit dhe me norma më të ulëta të interesit,  më e lehtë do të jetë për ato”, tha Regling. Ai nuk përmendi maturitetin e instrumentit, megjithatë analistët thonë se do të jetë një emetim 3 ose 5 vjeçare.

Ka dashur vite që ESM të jetë në pozitën për të emetuar në dollarë dhe të organizojë mënyrat për tu mbrojtur nga risku i huamarrjes në një valutë tjetër. Regling tha se mund të përdoren valuta të tjera gjithashtu, megjithatë nuk pritet në të ardhmen e afërt.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.