Etjen Xhafaj në ”Argument”: ‘Samiti i Berlinit, riafirmoi vullnetin e Gjermanisë për hapjen e negociatave’
Samiti i Berlinit ishte tema e së hënës në ‘’Argument’’ me të ftuar Etjen Xhafaj Zv.ministër për Europën dhe Punët e Jashtme. Në këtë samit u diskutua për herë të parë me vendet e Ballkanit Perëndimor për projekte të përbashkëta. Sipas zv.ministrit të jashtëm, ky samit është një arritje përsa i përket problematikave mes Kosovës dhe Serbisë, pasi ka arritur t’i ulë të dyja shtetet në një tavolinë.
Ndërsa si i takon hapjes së negociatave, sipas Xhafaj, Shqipëria dhe Maqedonia presin të kenë një tjetër raportim dhe konfirmim pas rezultateve pozitive kundrejt reformave të ndryshme që janë marrë, përkatësisht kundrejt Maqedonisë së Veriut e cila ndërroi emrin e saj dhe Shqipërisë në lidhje me reformën në drejtësi. ”Në të tilla kushte mund të flasim për një riafirmim të vullnetit të Gjermanisë për hapjen e negociatave. Duhet të pranojmë se Shqipëria i ka kryer të gjitha detyrimet e saj për tu bërë pjesë e Bashkimit Europian. ‘’
Gjatë intervistës në studio, Etjen Xhafaj, ka theksuar se hapja e negociatave nuk është një valë e re zgjerimi, por është një proces që ka disa hapa të cilat vendosin kohën e anëtarësimit, duke e bërë të qartë së ky nuk është një proces automatik, por përkundrazi kërkon një kohë relativisht të gjatë.
‘’Goditje do të ishte nëse do të kishim një shtyrje të hapjes së negociatave prej situatës politike në vendin tonë. Eshtë e rendësishme të kemi një vendim të qartë për qytetarët e rajonit, në lidhje me këtë cështje, në mënyrë që të mos dëmtohet politika e brendshme e këtyre vendeve. Ne jemi të vetëdijshëm se kemi ende nevojë për një infrastukturë që të ndihmojë në bashkimin rajonal, në mënyrë që të jenë sa më të thjeshta bashkëpunimet tregtare me qendrën e Bashkimit Europian‘’- shprehet zv.ministri Xhafaj.
Sa i takon progresit që ka bërë Shqipëria, ai thekson se kemi një rrjet kontaktesh me investitorët e huaj, pasi ka shumë interes për turizmin, bujqësinë por dhe energjitiken. Sektori më në rritje është ai i turizmit, pasi sipas tij jemi ne që po i kërkojmë investitorëve të shfaqin interes për Shqipërinë.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.