Euro 2020, frika nga përhapja e Covid / “Futbolli po vjen në shtëpi” mund të sjellë COVID-19 me vete!
“Futbolli po vjen në shtëpi”, është brohoritja e tifozëve të Anglisë në Euro 2020, por nëse është kështu, mund të sjellë COVID-19 me vete. Anglia do të përballet me Italinë në finalen e turneut në stadiumin Wembley të Londrës, i cili tashmë ka pritur dy gjysmëfinale gjatë dy ditëve këtë javë me rreth 60,000 spektatorë për ndeshje. Por, vendi po përballet me një valë të re të rasteve COVID-19, të nxitura nga një variant shumë ngjitës i Delta dhe largimin nga masat mbrojtëse anticovid, ndërsa Anglia del nga bllokimi i saj i tretë kombëtar.
Italia gjithashtu ka regjistruar rritje të rasteve të koronavirusit dhe epidemiologët në të dy vendet paralajmëruan se Euro 2020 mund të ndihmojë për të stimuluar virusin. Imperial College në Londër ka regjistruar një katërfishim të prevalencës COVID në muajin e fundit, ku femrat kanë 30% më pak mundësi për t’u infektuar krahasuar me meshkuj, pasi shumica e këtyre të fundit nuk respektojnë masat e distancimit social edhe për shkak të Euro 2020.
“Duket se shpjegimi më i besueshëm është se burrat kanë kontakte më të shpeshta të ngushta,” i tha Reuters Steven Riley, Profesor i Dinamikës së Sëmundjeve Infektive në universitet.
Kryeministri britanik Boris Johnson ka vonuar rihapjen e plotë të ekonomisë së Anglisë deri më 19 korrik, një javë pas finales, por njerëzit ende mund të mblidhen brenda në bare dhe restorante, me disa kufizime, për të parë ndeshjet.
Ndeshjet në Wembley janë “ngjarje pilot” që lejojnë turma më të mëdha ku tifozët duhet të testohen negativisht për COVID, ose të vaksinohen plotësisht. Përpara gjysmëfinales kundër Danimarkës, Kryeministri Johnson u bëri thirrje tifozëve të mbështesin Anglinë “me entuziazëm, por në një mënyrë të përgjegjshme”. Por, nuk ndodhi kështu, sepse pas fitores me Danimarkën tifozët anglezë vërshuan nëpër rrugë duke festuar.
“Unë mendoj se stadiumet po menaxhohen në mënyrë korrekte … (por) fakti që i gjithë kombi tani po feston është e frikshme,” tha Keith Still, profesor në Universitetin Suffolk, duke theksuar zonat e tifozëve si një rrezik të veçantë.
Tifozët në Itali gjithashtu do të mblidhen për të ndjekur finalen dhe ministri i shëndetësisë Andrea Costa u bëri thirrje të vendosnin maska, duke shtuar: “Maturia nuk do të thotë frikë”.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.