Euro dhe paundi, në një drejtim – Bien në $1.1259 dhe $1.2847 respektivisht, prej Italisë dhe Brexit
Rreziqet politike në Europë janë rikthyer, duke përndjekur investitorët. Euro ra në nivelin më të ulët në 16 muaj në nisje të Javës, ndërkohë që Komisioni Europian po përgatitet për betejë me Italinë, për buxhetin e partisë populiste.
Paralelisht, paundi britanik ra në nivelin më të ulët mujor, ndërkohë që Kryeministrja Theresa May po përballet me presione për të braktisur planin e saj për Brexit. Euro dhe paundi kanë rënë me më shumë se 4% kundër dollarit këtë vit, prej trazirave politike në Itali, pasigurive për Brexit dhe politikave lehtësuese monetare të Bankës Qendrore Europiane.
Euro ra me 0.6% në nisje të javës duke prekur 1.1267 kundër dollarit, që është nivelin më i ulët që prej Qershorit 2017. Ndërkohë, paundi britanik ra me 1%, në 1.2847 kundër dollarit. Fondet mbrojtëse dhe tregtarë të tjerë spekulues, kanë rritur pozicionet për shitje (short) ndaj euros, në 14,181 kontrata gjatë javës së kaluar, duke e çuar totalin në 46,843, që është qasja më pesimiste ndaj valutës që prej Marsit 2017.
Në vëmendje për valutën europiane është niveli teknik prej 1.1187 kundër dollarit amerikan. Në Itali, zv/kryeministri Matteo Salvini tha se Qeveria e tij mund të ndalojë vendimet e Bashkimit Europian për buxhetin nëse blloku vazhdon të tregojë mungesë respekti.
Në Londër, kabineti i Theresa May pritet të takohet së shpejti për të rënë dakord për planet e Brexit. Nëse May kërkon të arrijë marrëveshjen në Nëntor, si ç’ka bërë të ditur edhe Bashkimi Europian, java aktuale është Shansi i fundit për të që të bashkojë kabinetin e saj të ndarë. Korelacioni (r2) 40-ditor i euros me paundin është rritur ndjeshëm duke prekur 0.80, gjë që tregon se të dy valutat po ecin me të njëjtin drejtim.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.