Euro mund të forcohet, Coeure: Vendimi i fundit i bankës nxit një trend rritës

Benoit Coeure, anëtar i bordit drejtues të Bankës Qendrore Europiane, si dhe një prej zërave më aktiv brenda institucionit, deklaroi së fundmi se, vendimi i bankës për të vijuar me programin e blerjes së titujve, mund të gjenerojë një forcim të mëtejshëm të monedhës së përbashkët europiane.

Forcimi i euros ka qenë në qendër të debatit gjatë muajve të fundit, monedha e përbashkët europiane ka kapërcyer disa barriera kundrejt dollarit amerikan, duke bërë që eksportet e Eurozonës të marrin një goditje.

Kjo ka nxitur edhe spekulime të ndryshme sa i përket ecurisë së politikave monetare të Bankës Qendrore Europiane.

“Pas të gjithash, Rezerva Federale ka filluar të ulë programin e stimujve, ndërkohë që Banka Qendrore Europiane vendosi që të shtyjë në kohë programin  e saj”, nënvizoi Coeure.

Kjo, shtoi ai, mund të ketë nxitur investitorët që të presin një ribalancim të portofoleve jashtë dollarit amerikan, dhe drejt atyre të denominuar në euro, çka do të mbështeste euron.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.