Euro “prek” majën, Draghi: Jo objektiv, por efekt anësor i programit të BQE
Programi i blerjes së titujve të borxhit nga Banka Qendrore Europiane nuk ka sjellë lëvizje statistikisht të rëndësishme te euro dhe luhatjet në kursin e këmbimit janë thjesht një efekt anësor.
Këto janë komentet e presidentit të institucionit në Frankfurt, Mario Draghi, i cili shton se nuk është objektiv i politikave.
Euro është rritur thuajse me 5% që prej takimit të Dhjetorit të BQE dhe komentet e Draghit mund të shihen nga investitorët si një sinjal se mund të tolerohet një vlerësim i valutës së përbashkët. Euro u rrit gjatë kësaj jave në 1.2340 kundër dollarit amerikan, që është niveli më i lartë në më shumë se 3 vite.
“Ndërkohë që blerjet nën programin e lehtësimit sasior kanë qenë efektive në lehtësimin e kushteve financiare, këto nuk kanë sjellë lëvizje statistikisht të rëndësishme në kursin e këmbimit të euros. Këto lëvizje janë efekt anësor i politikave dhe nuk përbëjnë kanalin kryesor të transmetimit dhe nuk janë objektiv” – tha Draghi.
Ndërkohë e kundërta po ndodh për dollarin amerikan, pasi ka prekur nivelin më të ulët në 3 vite ditën e Mërkurë.
Dollari ra kundër të gjithë valutave kryesore, duke vazhduar rënien për të 3-ën ditë radhazi, ndërkohë që Sekretari i Thesarit në SHBA, Steven Mnuchin tha se zhvlerësimi po ofron një nxitje ndaj ekonomisë amerikane nëpërmjet tregtisë.
Investitorët do të monitorojnë takimin e BQE këtë javë, ndërkohë që ndjekin edhe forumin ekonomik në Davos.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.