Euro, surpriza e vitit – Performanca më e mirë që prej 2007, lë pas të gjithë
Viti i cili mendohej se do të kthehej në një rrezik të madh për monedhën e përbashkët europiane si pasojë e zgjedhjeve në disa vende, në fakt është kthyer në vitin më të mirë për euron në një dekadë, ose të paktën këtë tregojnë shifrat deri më tani.
Gjatë javës, euro preku nivelin më të lartë në 6 muaj kundrejt dollarit amerikan dhe është në rrugën e duhur për të qenë performuesja më e mirë mes 10 valutave kryesore për gjysmën e parë të vitit.
Disfata e kandidatëve anti-euro në zgjedhjet në Holandë dhe Francë, por edhe të dhënat makroekonomike mbi pritshmëritë janë katalizatorët e kësaj performance. Investitorët janë në garë se kush blen më shumë euro.
Deri më tani investitorët e huaj kanë blerë 7 miliardë dollarë fonde të këmbyera në Euro, që prej Marsit. Tregtia e javës në Shtetet e Bashkuara aktualisht është të blesh Euron kundrejt Jenit japonez.
Gjatë vitit, Euro ka fituar mbi 6%, ç`ka përkthehet në fitimin më të madh që prej vitit 2007. Bankat më të rëndësishme të kontinentit të vjetër, përfshirë Credit Agricole, Unicredit apo ING kanë rritur edhe projeksionet për kursin e euros gjatë këtij viti dhe atij të ardhshëm.
Performanca vjen pas një zhvlerësimi të monedhës së përbashkët me 23% gjatë tre viteve të kaluara, çka çoi edhe kancelaren Merkel gjatë javës që të deklaronte se, Euro është shumë e dobët për shkak të politikave të Bankës Qendrore Europiane.
Që Euro është e nënvlerësuar e tregojnë dhe shifrat. Në termat e fuqisë blerëse, Euro është monedha më e nënvlerësuar mes dhjetë kryesoreve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.