Euro të falsifikuara në Tiranë – Pre, pikat e ndryshme të karburantit
Në kuadër të operacionit të koduar “Euro 2”, Policia e Shtetit ka arrestuar në flagrancë dy individë për falsifikim monedhash.
Ata vepronin të ndarë nga njëri-tjetri, duke përdorur euro të falsifikuara në pikat e karburantit. Duke mashtruar me kartëmonedhat në prerje 50 dhe 100 euroshe, autorët arrinin të përfitonin karburant me paratë e parregullta, duke përfituar edhe kusurin në lekë.
Shtetasit G.M, 37 vjeç nga Kruja dhe D.I., 21 vjeç nga Fushë-Preza akuzohen tashmë për veprat penale të falsifikimit të monedhave dhe të mashtrimit.
Dyshohet se G.M. është autor edhe i një ngjarjeje të datës 25 Nëntor në rrugën “Aleksandër Moisiu” në Tiranë, ku në një pikë karburanti, dyshohet se ka dhënë si pagesë për furnizimin me karburant, një kartmonedhë 100 euro e falsifikuar.
Policia po punon për zbardhjen e ngjarjeve të tjera për të cilët mund të jenë përgjegjës dy autorët.
Pranimi i kartëmonedhave të huaja, kryesisht euro, është një praktikë e zakontë për bizneset e shitjes së karburantit, por edhe për biznese të tjera si shitës, lokale, hotele, etj. Mosqarkullimi i shpeshtë i këtyre valutave të huaja bën që shitësit mos t’i njohin mirë, duke rritur shanset që të bien pre e mashtrimit.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.