Eurobarometri/ Shqiptarët, pandemia dhe BE – Paradoksi, jemi më të goditurit nga kriza, por edhe më optimistët në Europë – SCAN MAGAZINE
Pjesa dërrmuese e shqiptarëve e mendojnë si mjaft të keqe situatën në të cilën ndodhet ekonomia e vendit apo ajo familjare. Komisioni Europian ka publikuar eurobarometrin më të fundit, I cili ka grumbulluar të dhëna deri në muajin gusht të këtij viti. Sipas studimit të kryer në formën e një anketë rezulton se, 71% e shqiptarëve e mendojnë si mjaft të keqe situatën e ekonomisë shqiptare, ndërsa 66% e tyre e mendojnë si mjaft të keqe gjendjen e financave të tyre personale. Të dyja këto norma janë mbi 10 pikë përqindje më të larta se në eurobarometrin e fundit, atë të vjeshtës së vitit të kaluar. Këto norma janë gjithashtu ndjeshëm më të larta se mesatarja e Bashkimit Europian, madje më të larta se në çdo vend tjetër të kontinentit të vjetër.
Por, ajo që bie tjetër në sy nga të dhënat e anketës është fakti se, shqiptarët kanë normën më të lartë të optimizmit në Europë, sa i përket pritshmërive për 12 muajt e ardhshëm. 48% e të anketuarve deklarojnë se presin që situata të jetë më e mirë gjatë 12 muajve në vijim. Madje, kjo normë është tre pikë përqindje më e lartë se një vit më parë. Mesatarja e BE-së fiksohet në vetëm 20%.
Edhe sa i përket pritshmërive të 12 muajve të ardhshëm për situatën e financave personale, shqiptarët kanë normën më të lartë në Europë të pritshmërive pozitive, në 44%. Sa i përket problemeve kryesore me të cilat përballen shqiptarët sot, shëndeti radhitet i pari, me 33%, ndjekur nga rritja e çmimeve me 28% dhe nga kushtet e jetesës me 24%. Në Bashkimin Europian ndërkohë, tre sfidat kryesore, sipas rëndësisë janë: inflacioni, shëndeti dhe situata ekonomike.
Çudia/62% e shqiptarëve e cilësojnë veten si shtresë e mesme
Ka një çudi jo pak të madhe në një prej pyetjeve, asaj që i mundëson njerëzve të kategorizohen në shoqëri sipas të ardhurave të tyre. Rezulton se, 62% e shqiptarëve e klasifikojnë veten e tyre si shtresë e mesme. Kjo përqindje do të na vendoste të tretët në Europë për peshën e shtresës së mesme në popullsi, çka do të habiste shumëkënd. Mbetet një anketë!
Impakti i pandemisë në “portofolin” e shqiptarëve
Eurobarometri i këtij viti merr një vëmendje edhe më të madhe, ashtu si çdo publikim tjetër, pasi vjen në mes të një pandemie globale. Dy krizat e njëpasnjëshme që kanë goditur vendin tonë, tërmeti i nëntorit të vitit 2019, si dhe pandemia, rrjedhimisht kanë ndryshuar shumëçka në mënyrën se si ndihen apo si I mendojnë gjërat shqiptarët. Eurobarometri I Komisionit Europian hedh dritë mbi shumë aspekte të jetës sonë. Një ndër to është edhe fakti se si i vlerësojnë shqiptarët masat e marra nga qeveria për të frenuar përhapjen e covid-19 në popullsi. Duhet pasur parasysh që anketa është kryer në muajt korrik dhe gusht, pra përjashton masat kufizuese të vendosura me ardhjen e vjeshtës si dhe tendencën e re të trajektores së rasteve ditore me infeksion, siç është psh detyrimi për të mbajtur maskë edhe në ambientet e hapura.
Një tjetër e dhënë që bie në sy në aspektin e impaktit të pandemisë është ajo se kriza, pavarësisht perceptimit, ka pasur ndikim minimal në aftësitë paguese të faturave të popullsisë shqiptare në fund të muajit. Madje, krahasuar me vjeshtën e vitit të kaluar, përqindja e atyre që deklarojnë se shumicën e kohës kanë vështirësi të paguajnë faturat, ka rënë, paçka se me vetëm 1%. Janë 16% e shqiptarëve që i përgjigjen me “shumicën e kohës” pyetjes se a kanë vështirësi të pagujanë faturat në fund të muajit. Një vit më parë, kjo përqindje fiksohej në 17.
Duke qëndruar te impkati i pandemisë në jetën e gjithësecilit, një tjetër pyetje e anketës së Komisionit Europian, jep të dhëna disi paradoksale me pyetjet e tjera të lartpërmendura. Të pyetur për impaktin e krizës në financat e tyre personale, shqiptarët janë më pesimistët në Europë, me 87% që thonë se “portofoli” i tyre do të ndikohet nga covid-19. Kjo normë është më e larta mes të gjitha vendeve të kontinentit të vjetër të marra në analizë. Vetëm 13% e shqiptarëve nuk pajtohen me mendimin se pandemia nuk do të ketë ndikim në “portofolin” e tyre, që është edhe norma më e ulët në Europë.
66% e shqiptarëve mendojnë se Zvicra është në BE
Eurobarometri ka për qëllim edhe të masë mendimin e vendeve të ndryshme të Europës për Bashkimin Europian. Shqipëria ka qenë historikisht vendi më pro unionit, por, diçka ka ndryshuar këtë vit. Në besimin e secilit vend ndaj Bashkimit Europian, Shqipëria një vit më parë renditej e para, por këtë vit, jo më. Paçka se, 62% e shqiptarëve kanë besim te Bashkimi Europian, kjo përqindje ka rënë në mënyrë drastike gjatë vitit të fundit, me plot 11 pikë përqindje, çka ka bërë që vendin e parë në këtë renditje ta marrë Danimarka, me 63%.
Një tjetër e dhënë ndërkohë, tregon se sa mirë e njohin shqiptarët Bashkimin Europian. Pavarësisht “dashurisë” së madhe për familjen e përbashkët europiane, 66% e shqiptarëve mendojnë se Zvicra është pjesë e Bashkimit Europian. Kjo normë është në rritje krahasuar me një vit më parë, dhe padiskutim norma më e lartë në Europë.
Roel Korkuti / SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.