Eurobondi 500 mln euro, brenda vitit – Qeveria synon gjysmën e dytë të këtij viti, do të ketë maturim 7-10 vjet
Qeveria shqiptare po intensifikon përpjekjet për të dalë në tregjet ndërkombëtare duke kërkuar një borxh të ri prej 500 milionë eurosh. Duket se eurbondi mund të emetohet që në gjysmën e dytë të këtij viti, ose të paktën ky është objektivi i Ministrisë së Financave dhe Ekonomisë. Diçka e tillë specifikohet në një dokument të ri që Ministria ka lëshuar, ku kërkon propozime për rolin e “joint lead managers”. Ky rol i referohet koordinatorit apo menaxherit të borxhit, i cili në bashkëpunim me bankat e investimeve ul risqet.
Në rastin konkret, Ministria e Financave dhe Ekonomisë nuk është në kërkim të një kompanie të vetme, por të disa të tillave. Në kërkesën për propozime, dikasteri nënvizon se, qëllimi është që eurobondi të emetohet në gjysmën e dytë të këtij viti, në rast se kushtet e tregjeve do të jenë të favorshme, në të kundërt, do të shtyhet për në muajt e parë të vitit të ardhshëm. Nëpërmjet kësaj kërkese për propozime, qeveria shqiptare jep edhe disa detaje të tjera të eurobondit të ri, si p.sh. afati i maturimit, i kërkuar mes 7 dhe 10 viteve. Një tjetër detaj i referohet monedhës së emetimit të borxhit, e cila duhet të jetë e denominuar në euro, paçka se në një dokument të disa ditëve më parë, Ministria e vendoste fokusin te synimi për ta emetuar këtë Eurobond nëpërmjet tregjeve amerikane të kapitalit.
Kujtojmë se nëpërmjet aktit normativ numër 26, qeveria shqiptare vetëm pak ditë më parë përfshinte në nenin 10 të ligjit të ndryshuar të buxhetit të shtetit, objektivin e një eurobondi të ri prej 500 milionë eurosh, pa dhënë më shumë detaje. Ndërkohë, eurobondi i fundit i emetuar është ai i vitit 2020, me një vlerë prej 650 milionë eurosh, me afat maturimi 7 vjeçar, dhe ku pjesa më e madhe e të cilit shkoi për të mbuluar eurobondin e kaluar. I ardhshmi do të shënonte eurobondin e 5-të të qeverisë shqiptare.
Ky borxh, sqaron Ministria e Financave dhe Ekonomisë në kërkesën për propozime, është i nevojshëm për të mbuluar nevojat për financim të qeverisë. Kujtojmë se rishikimi më i fundit i buxhetit të shtetit, përmban një rritje të shpenzimeve me thuajse 96 milionë euro, para të cilat do të kanalizohen nëpërmjet eurobondit 500 milionë eurosh.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.