Euroizimi i tregut financiar, AMF: 35% e primeve të sigurimit janë në euro

35% e primeve të shkruara bruto në sigurime realizohen në monedhën euro. Në kuadër të strategjisë për uljen e euroizimit, edhe Autoriteti i Mbikëqyrjes Financiare ka publikuar një analizë lidhur me shkallën e përdorimit të euros në tregjet financiare jo bankare, të rregulluara nga ky institucion.

Përveç produkteve të kartonit jeshil dhe sigurimit kufitar ka edhe disa nga produktet vullnetare që rezultojnë me të ardhura 100% të realizuara në euro, siç janë produktet vullnetare të aksidenteve dhe shëndetit, jeta dhe shëndeti në udhëtim, sigurimi i jetës së studentëve apo jeta e depozitorit.

Për sa i takon tregut të kapitaleve, ai mbizotërohet nga titujt e borxhit të qeverisë që janë kryesisht në lek dhe shkalla e euroizimit është mjaft e ulët. Megjithatë, ka edhe kompani private që kanë kryer emetime në valutë, kryesisht obligacione.

Sipas analizës së AMF, përdorimit i valutës në tregjet e mbikëqyrura prej saj është në nivele përgjithësisht të ulëta dhe i diktuar nga profili i veprimtarisë së institucioneve financiare.

Megjithatë, as AMF nuk përjashton që, në segmente të caktuara të këtyre tregjeve, mund të jetë nevoja për masa që ulin euroizimin dhe forcojnë përdorimin e monedhës kombëtare.

Autoriteti do të fokusohet në drejtim të ndërgjegjësimit të emetuesve private të titujve për rreziqet që shoqërojnë huamarrjen në valutë, në një kohë që të ardhurat kryesore të veprimtarisë janë në lekë.

Gjithashtu, do të kërkohet rritje e transparencës për produktet që iu ofrohen investitorëve, veçanërisht në drejtim të evidentimit dhe kuptimit sa më të qartë të rrezikut të kursit të këmbimit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.