Europa, më keq se kurrë – Katainen: Hera e parë që SHBA, Rusia dhe Kina, sfidojnë BE
Europianët do të votojnë më vonë gjatë javës për të zgjedhur politikanët e rinj në parlamentin europian dhe ka shumë sfida brenda 28 vendeve anëtare. Megjithatë, sipas zv/Presidentit të Komisionit europian Jyrki Katainen, sfidat e jashtme nuk kanë qenë ndonjëherë kaq të mëdha. “Vende si Rusia, Kina dhe Shtetet e Bashkuara na kanë sfiduar më shumë se kurrë”, tha ai. Sipas tij, është hera e parë në histori ku presidenti i Shteteve të Bashkuara dhe presidenti i Rusisë ndajnë të njëjtin këndvështrim që Europa të jetë e dobët.
Marrëdhënia përtej oqeanit atlantik ka qenë e vështirë kryesisht për BE, që kur Trump erdhi në detyrë në vitin 2016. Megjithatë, marrëdhënia e Bashkimit Europian me presidentin rus Vladimir Putin, përbën gjithashtu një sfidë. Europa është gjendur në konflikte me Rusinë, që prej vitit 2014, kur Moska aneksoi Krimenë dhe 28 vendet anëtare aplikuan sanksione ndaj Kremlinit.
Sipas Katainen, Rusia është gjithashtu e përgjegjshme për nxitjen e partive populiste, pra duke krijuar sfida brenda kontinentit. Jyrki Katainen tha se këto parti kërkojnë të copëzojnë Bashkimin Europian dhe shumë prej këtyre kanë lidhje të ngushta me Rusinë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.