Europa, me ndryshime minimale – Tregjet presin të dhënat ekonomike, fokusi te konflikti në Ukrainë!
Tregjet europiane e kanë nisur ditën me ndryshime të vogla, ndërsa janë të fokusuar te konflikti mes Rusisë dhe Ukrainës dhe tek të dhënat ekonomike që pritet të publikohen gjatë ditës së sotme. Indeksi pan-Europian Stoxx 600 po qëndron në rënie të lehtë me 0.1%, ndërsa fitimet më të mëdha i realizon sektori i naftës dhe gazit në rritje me 0.6%.
Shtetet e Bashkuara dhe Europa po konsiderojnë sanksione të reja ndaj Rusisë, pas akuzave se ka kryer krime kundër njerëzimit në Ukrainë. Presidenti Volodymyr Zelenskyy, paralajmëroi se më shumë viktima pritet të zbulohen në qytetet që janë pushtuar nga Rusia. Gjithashtu, SHBA pritet t’i kërkojë Asamblesë së Përgjithshme të Kombeve të Bashkuara të pezullojë Rusinë nga Këshilli i të Drejtave të Njeriut.
Në tregun e naftës, bençmarkët kryesorë po qëndrojnë në rritje, duke zgjeruar fitimet e një dite më parë. Nafta Brent e Londrës po tregtohet në rreth 108 dollarë për fuçi, ndërsa nafta Bruto amerikane po tregtohet në rreth 104 dollarë për fuçi.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.