Europa ndëshkon Italinë? – Francë-Gjermani, pakt për ta përjashtuar nga fondet e përbashkëta
Në prag të mbledhjes së radhës së eurogrupit, ku të Hënën do të fillojë edhe përballja mes shteteve anëtare sa i përket reformës së zonës së monedhës së përbashkët, ministrat e financave të Gjermanisë dhe Francës kanë nënshkruar një marrëveshje bazë, ku thuhet se, vendet të cilat nuk respektojnë rregullat e paktit të stabilitetit dhe rritjes, nuk do të përfitojnë në të ardhmen nga fondet e përbashkëta.
Të paktën këtë pretendon e përditshmja gjermane, `Der Spiegel`. Madje, dokumenti i firmosur nga dy ministrat i referohet specifikisht rastit të Italisë, vend i cili me ndërgjegje të plotë nuk i bindet rregullave të përbashkëta duke thënë se nuk do t`i respektojë ato.
Kujtojmë se, `molla e sherrit` është bërë deficiti publik, i projektuar nga qeveria italiane, përtej limitit të lejuar nga rregullat europiane. Kjo gjë ka shkaktuar zemëratën e vendeve europiane. Kështu, rezulton se, Italia dhe vendet e tjera që nuk do të respektojnë rregullat, do të përjashtohen nga një paketë vjetore prej rreth 22 miliardë eurosh.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.