Europa nën alert ndërsa Britania po heton rastet misterioze të hepatitit të rëndë tek fëmijët e vegjël!

Organizata Botërore e Shëndetësisë (OBSH) dhe agjencia shëndetësore e BE-së kanë lëshuar paralajmërime për vendet e tjera që të jenë në gatishmëri pas një rritjeje misterioze të rasteve të sëmundjeve të rënda të mëlçisë tek fëmijët në MB.

Agjencitë e shëndetit publik në Mbretërinë e Bashkuar po hetojnë 74 raste të hepatitit, një sëmundje që shkakton inflamacion të mëlçisë, te fëmijët që nga janari. Ekspertët shëndetësorë po hetojnë shkaqet e mundshme, pasi në këto raste nuk janë zbuluar viruset e zakonshme që shkaktojnë sëmundjen.

Agjencia e Sigurisë Shëndetësore e Mbretërisë së Bashkuar (UKHSA) tha më 12 prill se 49 raste të konfirmuara janë në Angli, 13 janë në Skoci dhe pjesa tjetër janë në Uells dhe Irlandën e Veriut.

Qendra Europiane e BE-së për Parandalimin dhe Kontrollin e Sëmundjeve (ECDC) tha se shumica e rasteve përfshinin fëmijë të moshës 2 deri në 5 vjeç. Ajo tha se disa fëmijë kishin pësuar dështim akut të mëlçisë dhe një “një numër i vogël kanë kërkuar transplantim të mëlçisë”. Ai tha se nuk kishte lidhje udhëtimi midis fëmijëve të prekur.

Çfarë është hepatiti?

Hepatiti është inflamacion i mëlçisë, i cili është një organ jetik për përpunimin e lëndëve ushqyese, filtrimin e gjakut dhe luftimin e infeksionit. Inflamacioni mund të ndikojë në funksionin e mëlçisë dhe sëmundja mund të ndryshojë në ashpërsi në varësi të shkakut. Ndërsa disa lloje të hepatitit janë të lehta dhe nuk kërkojnë trajtim, forma të tjera të sëmundjes mund të bëhen kronike dhe të jenë fatale.

Paralajmërim ECDC

ECDC tha se po ndan informacion në lidhje me rastet në Mbretërinë e Bashkuar për të “rritur ndërgjegjësimin midis mjekëve që kujdesen për fëmijët, për të përcaktuar nëse ka raste të ngjashme në vende të tjera”. Agjencia tha se mjekët duhet të jenë në vëzhgim për fëmijët me verdhëz dhe simptoma, duke përfshirë të vjella dhe probleme me stomakun.

I inkurajon ata që të raportojnë rastet e hepatitit akut tek fëmijët deri në 16 vjeç, në të cilat hepatiti A deri në E është përjashtuar, pranë agjencive të tyre shëndetësore kombëtare. ECDC po rekomandon gjithashtu shtetet anëtare të BE-së që të ndajnë informacione për çdo rast të tillë të dyshuar.

OBSH Europe tha pas njoftimit nga MB për rastet, më pak se pesë raste (të konfirmuara ose të mundshme) ishin raportuar në Irlandë dhe hetimet për to janë në vazhdim. Në Spanjë janë konfirmuar edhe tre raste të hepatitit akut me shkaqe të panjohura te fëmijët, të cilat aktualisht janë nën hetim. AP

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.