Europa për korrupsionin në Shqipëri – Progres vetëm në 4 rekomandime nga 10, vlerësohet reforma në drejtësi
Këshilli i Europës nëpërmjet grupit të vendeve kundër korrupsionit ka publikuar raportin e radhës për vendin tonë. Në vitin 2014 Greco i ka dhënë 10 rekomandime Shqipërisë, dhe sot në vitin 2018, vetëm 4 prej këtyre 10 rekomandimeve vlerësohen si të përmbushura, edhe pse jo plotësisht, por në mënyrë të kënaqshme. Këto rekomandime i referohen transparencës së legjislativit, publikimit të aseteve të parlamentarëve online dhe auditimin e shpeshtë dhe të plotë të këtyre deklaratave.
Gjashtë rekomandimet e tjera ndërkohë janë përmbushur vetëm pjesërisht. Ndër remoakndimet e plotësuara vetëm pjesërisht është edhe ai i krijimit të një mekanizmi për të raportuar rastet e konfliktit të interesit për deputetët, si dhe ai i vlerësimit të etikës së një prokurori, si dhe transparenca në emërimin e Gjykatës së Lartë. Një zhvillim pozitiv vlerësohet miratimi në muajin Prill të këtij viti i kodit të sjelljes së deputetëve, paçka se ky figuron ndër rekomandimet e plotësuara vetëm pjesërisht.
Greco vlerëson ecurinë e reformës në drejtësi në vendin tonë e sidomos kufizimin e kompetencave të Presidentit të Republikës për të emëruar gjyqtarët e Gjykatës së Lartë, një rekomandim që prej vitit 2014. Edhe distancimi i Ministrisë së Drejtësisë vlerësohet si një zhvillim tejet pozitiv.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.