Europa tërheq më shumë gaz nga Azia – Kina regjistron importin më të ulët në prill që nga tetori 2019
Europa po tërheq një pjesë më të madhe të ngarkesave të gazit të lëngshëm natyror (LNG), duke marrë sasi nga Azia, mes shqetësimeve të vazhdueshme për sigurinë e furnizimeve nga Rusia. Importet e gazit në Europë pritet të jenë rreth 11.13 milionë ton në prill, që do të ishte muaji me sasinë më të madhe që nga janari.
Importet e Azisë parashikohen në 20.55 milionë ton në prill, që do të ishte më e ulëta që nga qershori 2020. Pjesa e Kinës pritet të jetë rreth 4.56 milionë ton, më e ulta që nga tetori 2019. Ka qenë një fillim i qetë i vitit 2022 për blerjet e gazit nga Kina, me importe që kanë rënë çdo muaj që nga dhjetori, për shkak se shoqëritë kineze janë tërhequr kryesisht nga tregu spot dhe po marrin vetëm sasitë e tyre të kontraktuara.
Nga importet rekord të Kinës me gaz prej 78.93 milionë ton në vitin 2021, pak më shumë se dy të tretat ishin nën kontrata afatgjata dhe rreth një e treta në bazë të një marrëveshjeje ose kontratë afatshkurtër. Importet japoneze të gazit në prill vlerësohen në 5.7 milionë ton, që është më e ulët nga 6.37 milionë në mars.
Ndoshta më befasuese është se blerjet nga India, blerësi i katërt më i madh i gazit në Azi, po rezistojnë, duke pasur parasysh se vendi priret të jetë më i ndjeshëm ndaj çmimeve. Importet e Indisë në prill vlerësohen në 1.65 milionë ton, një rënie modeste nga 1.77 milionë e marsit dhe gjithashtu nga 1.92 milionë në prill 2021.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.