Europa “troket” në rajon – Hahn: Cilësi dhe jo shpejtësi. Tusk do japë të Martën porositë e fundit
Ballkani Perëndimor ka hyrë tashmë në një fazë të re. Propozimi për çeljen e negociatave me Shqipërinë dhe Maqedoninë ka hapur një perspektivë të re jo vetëm për dy vendet, por për të gjithë rajonin, ndërkohë që në Europë debatet do të marrin një hov tjetër, sidomos mes skeptikëve dhe pro-europianëve.
Në një intervistë për Euractiv gjerman, Komisioneri për Zgjerimin, Johannes Hahn, deklaroi se, vendet e rajonit kanë bërë progres të ndjeshëm, por se duhet ende shumë punë. Ai shtoi se, cilësia vjen përpara shpejtësisë dhe se viti 2025 nuk është një afat, por thjesht një datë sinjalizuese për Europën se kur mund të jetë vala e re e anëtarësimeve.
Gjatë javës ndërkohë, Ballkanin do ta vizitojë edhe presidenti i Këshillit të Europës, Donald Tusk. Ndalesa e tij e parë do të jetë pikërisht në Tiranë, ku pas takimit me kryeministrin shqiptar planifikohet edhe një konferencë e përbashkët për shtyp rreth orës 13.15. Si një ndër njerëzit që ka në dorë fatin e rajonit në Europë, fjalët e tij priten me mjaft interes.
Po të Martën, Tusk do të udhëtojë për në Podgoricë. Beogradi, Prishtina, Sarajeva dhe Shkupi do të përmbyllin turin e tij në Ballkan. Në Shkup pritet edhe një takim i Tusk me presidentët e vendeve të Ballkanit Perëndimor, si dhe Kroacisë dhe Sllovenisë. Gjuha që do të përdorë Donald Tusk pritet të jetë më e drejtpërdrejtë dhe më pak e moderuar se ajo e Komisionit Europian.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.