Europa zyrtarizon shqetësimin, Gabriel: SHBA mund të nisin një luftë tregtare me ne

Berlini zyrtar është i shqetësuar se, Shtetet e Bashkuara të Amerikës do të fillojnë një luftë tregtare me Bashkimin Europian, deklaroi Ministri i Jashtëm gjerman, Sigmar Gabriel, pak përpara fillimit të punimeve të samitit të G20-ës që do të mbahet në Hamburg.

Gabriel rreth një vit më parë ka mbajtur postin e Ministrit të Ekonomisë në Gjermani. Berlini ka qenë vazhdimisht i shqetësuar sa i përket qasjes së administratës së re amerikane me Donald Trump në krye ndaj Europës së bashkuar.

Kjo është deklarata e parë e drejtpërdrejtë që zyrtarizon një shqetësim të tillë e që tregon sesi janë realisht marrëdhëniet mes Brukselit dhe Washingtonit.

“Ka disa gjëra që sinjalizojnë se Shtetet e Bashkuara mund të nisin një luftë tregtare me Europën”, nënvizoi Gabriel, i cili shtoi se, Berlini do të vazhdojë të punojë për të gjetur rrugën e dialogut.

Donald Trump dhe administrata e tij kanë akuzuar shpeshherë Europën, e veçanërisht Gjermaninë, se po konkurron jo ndershmërisht në tregtinë globale, duke shfrytëzuar zhvlerësimin e monedhës së përbashkët europiane.

Përplasja tjetër mes dy vendeve ishte ajo për paktin e ndryshimeve klimatike, pasi Donald Trump anuloi marrëveshjen historike të Parisit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.