Europianët jetojnë vetëm – Një e treta e familjeve me një person, në Suedi gjysma

Në të gjithë Bashkimin Europian numërohen rreth 220 milionë familje, për vitin 2016. Tipologjia më e përhapur e familjeve është ajo e përbërë nga vetëm një person, dhe zë 33% të totalit, më pas ndjek ajo e çifteve pa fëmijë, 25% e totalit dhe më pas ajo e çifteve me fëmijë, vetëm 20% e totalit.

Ajo që surprizon nga këto të dhëna është diferenca e theksuar mes vendeve anëtare. Në Suedi, tregojnë të dhënat më të fundit të publikuara nga Eurostat, më shumë se një në dy familje, përbëhet nga vetëm një person, 52% e totalit. Suedia ndërkohë ndiqet nga Lituania me 43.3% të totalit.

Në të gjithë Bashkimin Europian, kjo normë është rritur me thuajse 4 pikë përqindje në harkun e dhjetë viteve të fundit. Në Finlandë, një në tre familje, është e përbërë nga një çift i vetëm pa fëmijë.

Eurostat merr në vlerësim edhe Maqedoninë dhe Turqinë, dhe të dhënat tregojnë diferencën e theksuar në mënyrën e jetesës mes vendeve të Bashkimit Europian dhe atyre jashtë unionit. Në Maqedoni vetëm një në 10 familje përbëhet nga një person i vetëm.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.