Eurostat e rendit Kosovën, si vendi me çmime më të lira të energjisë elektrike
Shpeshherë është thënë se çmimet e energjisë elektrike në Kosovës janë të larta, por këto pohime i hedhen poshtë një raporti i Eurostat-it për çmimet e energjisë elektrike për konsumatorët familjarë, i cili Kosovën e rendite si vendin me çmime më të lira të energjisë.
Ekspertët e fushës thonë se krahasimi i tillë nuk duhet të jetë befasues, pasi në tarifat e energjisë elektrike ndikon gjendja e përgjithshme socio-ekonomike në Kosovë.
“Janë disa faktorë që kanë ndikuar në çmimin e energjisë., të cilët kryesisht ndërlidhen me momentin social- Kosova është vendi më i varfër, vendi me papunësi më të madhe, vendi që edhe në të ardhmen e afërt nuk sheh zgjidhje për këto probleme, vendi që ka mungesë të energjisë elektrike dhe ku shteti në forma të ndryshme intervenon që çmimi i energjisë elektrike të jetë i përballueshëm për konsumatorët”, tha Ibrahim Rexhepi, ekspert i ekonomisë nga Aleanca Kosova e Re.
Sipas Rexhepit, tregu i energjisë elektrike ende nuk është i liberalizuar, shkruan Telegrafi.
Në Zyrën e Rregullatorit për Energji (ZRRE), treguan se i kanë marrë kërkesat nga operatorët për tarifat e energjisë elektrike dhe se janë duke i shqyrtuar. Ndërsa vendimi për tarifat e reja pritet të publikohet deri në fund të marsit.
“Operatorët e Licencuar për shërbimet e energjisë elektrike, tashmë kanë dorëzuar në ZRRE kërkesat për azhurnimet vjetore për të hyrat e lejuara maksimale dhe tarifat e energjisë elektrike. Stafi profesional i ZRRE-së është duke i analizuar këto kërkesa dhe së shpejto do të vendosë në diskutim publik raportet konsultative, ku do të paraqiten kërkesat e operatorëve dhe vlerësimet preliminare të ZRRE-së. Tarifat aktuale do të jenë në fuqi deri me 31 mars 2017 dhe ZRRE do të sigurohet që para 1 prillit 2017, konsumatorët të njoftohen me tarifat e reja”, ka thënë zëdhënësja e ZRRE-së, Adelina Murtezaj.
Në raportin e Eurostat-it për çmimet e energjisë elektrike për konsumatorët familjarë, prapa Kosovës renditen, Serbia, Maqedonia, Shqipëria, Bosnja e Hercegovina, Bullgaria, Mali i Zi, Moldavi, Estoni dhe vende të tjera.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.