Eurozona/ Inflacioni rrezikon të zhduket në 10 vitet e ardhshme
Për më pak se një muaj (1 nëntor) në Bankën Qendrore Europiane do të realizohet ndërrimi i i postit më të lartë midis Mario Draghi dhe Christine Lagarde. Për gruan që ka udhëhequr Fondin Monetar Ndërkombëtar për vite me radhë, detyra e re nuk do të jetë e lehtë. Këtë e tregon tendenca e të dhënave që vlerësohen më shumë nga BQE: pritjet në afat të mesëm të inflacionit në zonën e euros. Të enjten, 3 tetor, indeksi relativ (inflacioni 5-vjeçar i Eurozonës, i cili vlerëson trendin e çmimeve të konsumit për 5 vitet e ardhshme dhe më vonë) ka rënë në nivelin e ulët të të gjitha kohërave, në 1.12%.
Agresiviteti i paketës Draghi
Për momentin situata është shumë larg nga objektivi ligjor i BQE (“më i ulët por afër 2%”). Dhe ajo që është më shqetësuese është fakti që kjo rënie e re e ardhshme e inflacionit vjen disa javë pas fillimit (12 shtator) të një pakete masash ekstra-ekspansive të drejtuara nga institucioni, i cili edhe për pak do të drejtohet nga Draghi, si: prerja e normës së depozitave në -0.5% deri në rivendosjen e programit të blerjes së letrave me vlerë (lehtësim sasior) në masën 20 miliardë euro në muaj. Një paketë që konsiderohet shumë agresive në atë pikë sa befasoi Sabine Lautenschläger, një nga gjashtë anëtaret e Komitetit Ekzekutiv, e cila ka vendosur të japë dorëheqjen. Një paketë që vazhdon të kritikohet ashpër nga gjermanët e mëdhenj, nga Allianz deri te Deutsche Bank.
Por pse nuk rritet inflacioni?
Përgjigja është mjaft e thjeshtë: ekzistojnë dy burime që mund ta bëjnë atë të rritet: 1) paga; 2) çmimi i naftës. Në rastin e parë flasim për një inflacion të mirë, në të dytin për inflacionin e keq, pasi ai është i importuar dhe jo simptomatik i rritjes së shëndetshme të konsumit që vjen nga një rritje e të ardhurave. E vërteta është se pagat janë në një pikë ‘të vdekur’ dhe në shumë zona të Eurozonës, ku deflacioni i pagave po zhvillohet si kompensim për pabarazitë tregtare, diktuar edhe nga teprica e madhe gjermane, pagat madje po bien.
E ashtuquajtura Helicopter Money (Parà Helikopter)
Kjo është arsyeja pse çështja e Helicopter Money po merr gjithnjë e më shumë rrënjë në debatin akademik dhe politik. Një operacion përmes të cilit BQE mund, në rastin më ekstrem, të kreditonte para drejtpërdrejt te qytetarët, pa kaluar nëpër banka. Por Lagarde tashmë ka treguar në një farë mënyre dëshirën për t’iu afruar popullit kur u shpreh se fundmi se: “është e nevojshme që BQE të kuptohet nga tregjet, por që ajo të kuptohet edhe nga qytetarët ndaj të cilëve, në fund të fundit, politikat e saj adresohen ». (Ilsole24ore)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.