Eurozona, në vrull – Firmat rrisin punësimin prej kërkesës së madhe

Ekonomia e Eurozonës ka rifituar vrull në Nëntor dhe pritet të tregojë performancën më të mirë vjetore që prej krizës financiare.

Kompanitë në bllokun e valutës së përbashkët kanë rritur punësimin me normën më të shpejtë në 17 vite, për t’i bërë ballë kërkesës së madhe.

Sondazhet drejt firmave treguan se besimi i bizneseve në Francë, ka patur rritjen më të madhe në një dekadë, ndërsa fabrikat në gjermani, ndodhen në pefromancën më të mirë që prej 2011-ës.

Duke marrë nxitje nga normat e ulëta të interesit dhe programin e blerjes së obligacioneve të Bankës Qendrore Europiane,  papunësia në Eurozonë ka rënë dhe rajoni ndodhet në rritjen më të sinkronizuar mes vendeve anëtare që prej krijimit të valutës së përbashkët.

Kompania që ndërmerr sondazhet, Markit, projekton që rritja ekonomike do të përshpejtohet në 0.8% në tremujorin e katërt, që është niveli më i lartë në 7 vite.

Sipas analistëve, nuk ka asnjë element që pritet të ndalojë vrullin për këtë vit dhe nisja e 2018-ës do të jetë optimiste gjithashtu.

Komisioni Europian rriti projeksionet në 2.2% këtë vit dhe 2.1% në 2018-ën.  Eurozona ka treguar rritje për 18 tremujorë radhazi.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.