Eurozona “ngadalësohet” në fundvit – Gjermania “rëndon” në T4. Me bazë vjetore kompensohet nga Franca dhe Italia
Rritja ekonomike në zonën e valutës së përbashkët është ngadalësuar në 3 muajt e fundit të vitit 2021, ashtu si ç’pritej, por gjithsesi regjistroi rritje të fortë vjetore, pasi performancat pozitive në Francë dhe Itali, kompensuan për dobësinë e Gjermanisë. Zyra e Statistikave e Bashkimit Europian, Eurostat, theksoi në vlerësimet paraprake se Produkti i Brendshëm Bruto në 19 vendet e Eurozonës u rrit me 0.3% me bazë tremujore në periudhën Tetor-Dhjetor 2021, dhe me 4.6% me bazë vjetore.
Ekonomistët prisnin një rritje me 0.3% nga tremujori i kaluar dhe me 4.7% nga e njëjta periudhë një vit më parë, ndërkohë që ekonomia po vazhdon të rimëkëmbet nga masat e karantinës së koronavirusit. Ekonomia e dytë më e madhe e Eurozonës, Franca, pati një rritje tremujore me 0.7% dhe një rritje me 5.4% nga e njëjta periudhë një vit më parë. Ndërkohë, ekonomia e tretë, Italia, u rrit me 0.6% dhe me 6.4% në mënyrë respektive. Gjermania, ekonomia më e madhe e Europës, ishte performuesi më i dobët, me një tkurrje prej 0.7% në tremujorin e fundit dhe me një rritje vjetore prej vetëm 1.4%.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.