Eurozonë, inflacioni në 1.3% – Norma është e pandryshuar në krahasim me qershorin
Norma e inflacionit në Eurozonë ka qëndruar pranë nivelit të 1.3% edhe gjatë muajit Korrik, por aq sa ishte muajin e kaluar, tregojnë të dhënat më të fundit të publikuara nga zyra europiane e statistikave.
Të dhënat rezultojnë gjithashtu në linjë me pritshmëritë e tregjeve dhe analistëve. Gjithsesi, ky mbetet një vlerësim paraparak që mund të ndryshojë.
Ndër zërat kryesorë të çmimeve të konsumit, energjia vlerësohet të ketë pasur kontributin kryesor në rritjen e çmimeve.
Çmimet e energjisë u rritën kështu me 2.2% gjatë Korrikut, në krahasim me Korrikun e vitit 2016.
Çmimet e shërbimeve u rritën me 1.5% dhe ushqimet, pijet dhe cigaret me 1.4%, po aq sa në Qershor.
Të dhënat e publikuara i japin të drejtë fjalëve të Mario Draghit dhe politikës së Bankës Qendrore Europiane.
Draghi dhe institucioni të cilin ai drejton, i kanë mëshuar gjatë muajve të fundit faktit se, inflacioni vijon të mbetet ende i ulët dhe larg objektivit të bankës, paçka se, forcat deflacioniste janë larguar. Kjo, sipas institucionit me bazë në Frankfurt përkthehet në kujdes dhe normalizim gradual të politikave monetare.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.