Evergrande rinis punën në mbi 10 projekte – Përpiqet të rrisë besimin, pasi mezi shmangu dështimin javën e kaluar
Gjiganti i pronave në Kinë, Evergrande, deklaroi në fundjavë se ka nisur punën në mbi 10 projekte në 6 qytete përfshirë Shenzhen, sipas një deklarate që vjen pasi shmangu dështimin në minutën e fundit për një pagesë të kuponit të obligacionit në javën e kaluar. Evergrandë, e zhytur në krizë me mbi 300 miliardë dollarë detyrime, nuk ka shpalosur se në sa prej 1,300 projekteve të pronave të paluajtshme në Kinë, është detyruar të ndalojë punimet.
Kompania deklaroi në Gusht se disa projekte janë pezulluar për shkak të vonesave në pagesa ndaj furnitorëve dhe kontraktorëve dhe se po negocionte rinisjen e ndërtimit. Këtë fundjavë, gjiganti që shkaktoi frikë të një krizë të re financiare në botë, theksoi se disa prej projekteve kanë rinisur punën, ndërsa ndërtesa të tjera kanë përfunduar. Evergrande deklaroi se përpjekja për të garantuar ndërtimin do të shtojë besimin në treg dhe postoi disa foto të punëtorëve të ndërtimit, të stampuar me një kohë dhe datë.
Veprimi i javës së kaluar për të paguar 83.5 milionë dollarë interesa ndaj një obligacioni në dollar, i ofroi një tjetër javë Evergrande që të luftojë me krizën e borxhit, që kanë nxirë perspektivën e ekonomisë së dytë më të madhe në botë. Veprat e Evergrande kanë sjellë lëkundje të forta tek sektori prej 5 trilionë dollarë i pronave në Kinë, që përbën 25% të ekonomisë sipas disa treguesve, ndërkohë që janë lajmëruar një valë dështimesh, zhvlerësimesh të kreditit dhe rënie të borxheve koorporative. Kriza e borxhit e Evergrande po monitorohet nga tregjet botëror të financave, që shqetësohen për efekte ngjitëse.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.