Fabrikat në Eurozonë – Aktiviteti ngadalësohet gjatë Shkurtit, performanca mbetet ende e fortë
Manifaktura në zonën e valutës së përbashkët është ngadalësuar më tej gjatë Shkurtit, megjithatë aktiviteti qëndron ende në nivelin më të lartë në thuajse 2 dekada. Të dhënat se rimëkëmbja është ende e fortë dhe e përhapur gjerësisht, së bashku me presionet për rritjen e çmimeve, do të mirëpriten nga politikëbërësit e Bankës Qendrore Europiane, ndërkohë që përgatiten për të përfunduar programin e stimujve monetarë.
Indeksi PMI për fabrikat e eurozonës, që formulohet nëpërmjet mijëra anketimesh drejt sektorit, shënoi 58.6 pikë në Shkurt nga 59.6 që ishte një muaj më parë. 50 pikëshi është niveli që ndan tkurrjen nga ekspansioni, ç’ka do të thotë se pjesa më e madhe e bizneseve kanë raportuar përmirësime në sondazhe.
Sipas analistëve, indeksi për tremujorin e parë deri më tani, tregon për performancën më të fortë që prej vitit 2000 dhe se përhapja e gjerë e kësaj rimëkëmbje përbën lajm pozitiv, ndërkohë që të gjithë shtetet e anketuara raportuan shifra pozitive. Ndërkohë që kërkesa e fortë vazhdon të kalojë ofertën, pritet të shfaqen edhe presione për rritjen e çmimeve.
Megjithatë, sipas Eurostat, inflacioni në zonën e valutës së përbashkët u ngadalësua në 1.2% për Shkurtin, që është ende larg tavanit prej 2% të Bankës Qendrore Europiane.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.