Fabrikat “shpëtojnë” nga taksa e qumështit pluhur – Udhëzimi/ Kriteret që duhet të plotësojnë, detyrim autorizimi
Subjektet e prodhimit dhe përpunimit të qumështit dhe nënprodukteve të tij, janë të përjashtuara nga pagimi i taksës kombëtare të qumështit pluhur në import apo blerjen e tij brenda vendit nëse plotësojnë disa kritere. Sipas udhëzimi të përbashkët të Ministrisë së Financave dhe Ministrisë së Bujqësisë, fabrikat përjashtohen nga taksa prej 100 lekë për kg, nëse në etiketa kanë të pasqyruar përmbajtjen në përqindje të qumështit pluhur në produktin e gatshëm që tregtohet si dhe të jenë të pajisur me kartën teknologjike të produkteve që kontrollohet nga Autoriteti Kombëtar i Ushqimit.
Po ashtu fabrikat duhet të pajisen me autorizim nga drejtoria rajonale e tatimeve, në lidhje me veprimtarinë që ata ushtrojnë në fushën e përpunimit të qumështit dhe prodhimit e tregtimit të nënprodukteve të tij. Autorizimi i lëshuar nga drejtoria rajonale e tatimeve depozitohet në strukturat përkatëse të administratës doganore, e cila lejon mospagimin e taksës së qumështit pluhur për kategorinë e subjekteve të pajisura me vërtetim nga administrata tatimor.
Ndërsa subjektet e tjera tregtare të kategorive të ndryshme, të cilat mund të përdorin qumështin si lëndë të parë për prodhimin e produkteve të tyre, nuk pajisen me autorizim dhe kanë si detyrim pagesën e kësaj takse. Vendi ynë thuajse ka 5-fishuar importin e qumështit pluhur vitet e fundit, në mesatarisht 1488 ton në vit me vlerë rreth 3.3 milionë euro. Burimi kryesor i qumështit pluhur është Ukraina.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.