Fake news e portale anonimë- Nis shqyrtimi i ligjit të shumëdebatuar për mediat/ Ministria: Transparencë pronarëve!
Kuvendi ka nisur zyrtarisht shqyrtimin e paketës së shumëdebatuar me ndryshimet në ligjet që shtrëngojnë rregullat e veprimit të portaleve e mediave elektronike. Ndryshimet u paraqitën përpara deputetëve të Komisionit Parlamentar të Ligjeve nga Zëvendësministrja e Drejtësisë Fjoralba Caka, i shoqëruar nga Kreu i Autoritetit të Mediave Audiovizive, Gentian Sala. Caka tha se paketa synon të rregullojë një listë të gjatë problemesh që hasen veçanërisht me portalet online. Sipas saj në emër të klikimeve apo të fitimeve portalet abuzojnë me lajmet për qëllime financiare, por po aq problematik është edhe keqinformimi me dashje.
Caka renditi një numër problematikash që synon të rregullojë paketa. Ato nisin nga keqinformimi apo fenomeni i njohur si fake news, te punësimi në të zezë i gazetarëve, te problemi i pronarëve anonimë, që mund të shfrytëzohet nga biznese të caktuara apo oligarkë, te e drejta e autorit, e shkojnë deri te cënimi i privatësisë apo i të drejtave të njeriut në rastet e lajmeve për të cilët nuk njihet as autorësia as pronari i medias. Nga e hëna ndryshimet që propozon paketa do të diskutohen me palët e interesit, ku përfshihen operatorët mediatikë, shoqatat jofitimprurëse e deri te gazetarët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.