Falja fiskale, 111 mijë biznese “amnistohen” për mosdeklarim në kohë

Drejtoria e Përgjithshme e Tatimeve njoftoi mbylljen fazës së dytë të faljes fiskale. Sipas njoftimit zyrtar, procesi i fshirjes së detyrimeve për mosdeklarim në afat është finalizuar dhe, në total, kanë përfituar mbi 111 mijë tatimpagues.

Llojet e dënimeve që janë fshirë nga sistemi elektronik për deklarim të vonuar janë listë-pagesat e tatimit mbi të ardhurat personale, deklaratat e TVSH-së, deklarata për destinimin e fitimit, deklaratat e tatim-fitimit dhe të taksave kombëtare. Drejtoria e Përgjithshme e Tatimeve njofton se procesi i fshirjes automatike do të vijojë hap pas hapi me zërat e tjerë që parashikon ligji i faljes.

Nga ana tjetër, administrate tatimore iu kujton tatimpaguesve të konsultojnë ligjin lidhur me detyrimet që përjashtohen nga falja. Ligji parashikon faljen pa kusht të të gjitha detyrimeve tatimore dhe doganore deri në 31 dhjetor 2010, për një vlerë prej rreth 29 miliardë lekësh.

Për detyrimet nga viti 2011 deri në fund të vitit 2014 do të falen gjobat dhe kamatëvonesat, me kushtin që të paguhet detyrimi. Skema e faljes së detyrimeve tatimore vlen edhe për taksat vjetore të automjeteve. Veç bizneseve, përfitues të faljes fiskale do të jenë edhe të punësuarit në qytet dhe fshat të cilët nuk kanë paguar detyrimet për sigurimet shoqërore. Për këtë kategori do të falen gjobat dhe kamatëvonesat, por jo kontributet.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.