“Falja me kusht e detyrimeve për periudhën 2011-2014”, Vjero: Tatimpaguesit të paguajnë principalin që të përfitojnë

“Ligji i faljes është një nga ligjet më të mira që është bërë deri më tani, nga ku administrata tatimore e kryen detyrën e saj e qetë dhe tatimpaguesve nuk iu është kërkuar të shkojnë në sportele për të kërkuar fshirjen e gjobës. Në mënyrë elektronike kemi shkëputur marrëdhënien e tatimpaguesve me administratën tatimore”.

Kështu është shprehur në një intervistë për emisionin “Para dhe Pasuri” në Ora News, drejtorja e Përgjithshme e Tatimeve, Vasilika Vjero, ku ndër të tjera shtoi se 111 mijë tatimpaguesve iu fshihen gjobat për deklarimet e vonuara, për depozitim me vonesë të pasqyrave financiare, si pjesë e ligjit të faljes.

Gjithashtu, drejtorja e Përgjithshme e Tatimeve foli edhe për faljen e gjobave para vitit 2010, si dhe faljen me kusht të detyrimeve të vitit 2011-2014, ku ka ftuar tatimpaguesit të paguajnë principlain që të jenë përfitues.

“Ligji për amnistinë fiskale po aplikohet nga administrata tatimore me fasha te caktuara kohore. Ne presim që të kemi disa ndërhyrje të rëndësishme që lidhen me fshirjen e detyrimeve para vitit 2010, në këtë mënyrë do të ndihmojmë administratën tatimore, duke e liruar nga regjistrat nga detyrime të pa mbledhura që e rrisnin borxhin në mënyrë artificiale. Dy nga momentet e rëndësishme janë fshirja e detyrimeve para vitit 2010, si dhe falja me kusht, ku tatimpaguesit për periudhën 2011-2014 do të paguajnë principalin për të përfituar nga falja. Ftoj tatimpaguesit që të paguajnë principalin që të përfitojnë, kanë kohë deri në fund të dhjetorit. Ende nuk kemi reagim pozitiv të tatimpaguesve, për të paguar principalin dhe për te përfituar nga falja e gjobave”, shprehet Vjero.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.