“Falni gjobat për maskat dhe orën policore” – Projektligji i Murrizit: Kishin karakter frenues për pandeminë, të lehtësojmë qytetarët

Pasi bëri këtë deklaratë në Kuvend, deputeti Myslim Murrizi ka depozituar në Kuvend edhe projektligjin, ku kërkon heqjen e masave administrative, sikurse janë gjobat, pezullimi i lejeve të drejtimit apo bllokimi i automjetit, të vendosura gjatë kohës së pandemisë së shkaktuar nga Covid-19. Sipas Murrizit, kjo nismë ka për qëllim të lehtësojë qytetarët, ndërkohë që sipas relacionit që shoqëron projektligjin, gjobat për mos vendosje maske, për shkelje të orarit të ndalim qarkullimit të këmbësorëve dhe drejtuesve të mjeteve, pezullimi i lejeve të drejtimit apo bllokimi i mjeteve kanë qenë masa administrative frenuese për efekt të pandemisë. Ndërkohë që, sipas deputetit kjo amnisti shihet si e arsyeshme në kushtet kur shifrat e të prekurve nga COVID-19 janë në ulje drastike e po shkojnë drejt zeros.

“Duke qenë se të gjitha masat administrative në kohë pandemie kanë pasur në vetvete karakterin shtrëngues të disiplinimit me orar të qytetarëve sipas orës policore të vendsour me Akte të ndryshme Normative dhe jo ndëshkimin e qytetarëve, në situatën e sotme, pas vaksinimit të mbi 500 mijë shqiptarëve dhe kalimit në një fazë tjetër të emergjencës së pandemisë, shoh që të gjitha masat me karakter administrativ e kanë përmbushur qëllimin e tyre”.

Sipas Murrizit falja e këtyre gjobave nuk cenon autoritetin e shtetit apo prek buxhetin, por ndihmon dhe lehtëson qytetarët.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.