Falsifikohen letrat me vlerë – Tre raste në Gjykatën e Lartë, 2 hetime nga Prokuroria
Ndërsa flitet më së shumti për falsikimin e kartëmonedhave, dy vitet e fundit, organet e drejtësisë janë përballur me raste të falsifikimit të letrave me vlerë.
Të paktën 3 raste të kësaj vepre penale janë marrë në shqyrtim nga Gjykata e Lartë në vitin 2016 dhe 2017. Rastet janë konstatuar dhe hetuar përkatësisht nga Prokuroritë e Tiranës, Elbasanit dhe Durrësit.
Vetë Prokuroria e Përgjithshme raporton se gjatë vitit 2017 ka hetuar dy raste për falsifikim të letrave me vlerë, 1 prej të cilëve është çuar në gjykatë.
Ndërkohë që shumë më i lartë është numri i procedimeve hetimore për falsifikimin e monedhave, ndaj të cilit prokuroria ka nisur 133 procedura hetimore gjatë dy viteve të fundit.
Të ekspozuara ndaj këtyre falsifikimeve janë çeqet e ndryshme, kambialet, deri edhe bonot apo lekët e privatizimit të emetuara gjatë viteve 90’, të cilat aktualisht përdoren në procesin e legalizimit të objekteve pa leje apo në privatizimin e ndërmarrjeve shtetërore.
Falsifikimi i letrave me vlerë parashikohet nga neni 184 i Kodit Penal dhe dënohet me burgim deri në pesë vjet. Po kjo vepër, kur kryhet në bashkëpunim, më shumë se një herë ose ka sjellë pasoja të rënda, dënohet me burgim nga tre gjer në dhjetë vjet.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.