Familjet e dala nga ndihma ekonomike, Rama: 55 mijë lekë çdo muaj për t’u riaftësuar në qendrat e formimit profesional
Të gjithë individët që dalin nga ndihma ekonomike do të kenë mbështetjen e qeverisë për t’u riaftësuar dhe integruar në tregun e punës. Kryeministri Rama tha se çdokush që është në gjendje për të punuar do të marri nga shteti çdo muaj 55 mijë lekë për t’u riaftësuar në qendrat e formimit profesional, dhe më pas të punësohet. Rama tha se varfëria nuk mund të luftohet me lëmoshë dhe propagandë.
“Ndihma ekonomike nuk është zgjidhje afatgjatë, por një moment solidariteti. Ndihma ekonomike nuk të rrit të ardhurat, por të bllokon. Sot kush del nga ndihma ekonomike dhe është i aftë për punë, del nga një situatë ku merrte 35 mijë lekë të vjetra. Dhe ka menjëherë në dorë 55 mijë lekë nga shteti për t’u riaftësuar në qendrat e formimit profesional. Është shumë gati sa shuma e re ndihmës ekonomike që do të jetë 58 mijë lekë. Shkoni në zyrat e punë dhe regjistrohuni në punë, nëse nuk keni asnjë aftësi, shkoni në qendrat profesionale dhe do të merrni këtë mbështetje nga shteti prej 55 mijë lekë nga shteti për t’u riaftësuar. Punësimi nuk të vjen në shtëpi. Punësimi kërkohet dhe krijohet duke u aftësuar”.
Rama u bëri thirrje drejtuesve të zyrave të punësimit për të bërë më shumë punë.
“Ne jemi të vetëdijshëm se zyrat tona të punësimit do bëjnë shumë më tepër, nuk do jetë një zyrë që pret dhe përcjellë, por një zyrë që mbështet njerëzit që janë në kërkim të një pune. Ky mandat i ri është mandat i punësimit, integrimit në punë nëpërmjet aftësimit. Zyrat e punësimit duhet të trokasin në çdo dyer sipërmarrje për të krijuar mundësi për të gjitha ata që duan të punësojnë. Shoh këtu të gjithë drejtorët e zyrave të punësimit, dhe them se ju duhet të punoni më shumë se jeni hallka kryesore”.
Ministri i Ekonomisë dhe Financave në fjalën e tij tha se fokusi gjatë vitit 2018 është kthimi i zyrave të punësimit në një zyrë misioni që jep dritë duke ofruar më shumë vende pune.
“Fokusi në 2018 është që ta kthejmë zyrën kombëtare të punës në një mision që jep jete dhe dritë duke ofruar një punë. Dy pika janë të rëndësishme për ne: Së pari, strategjia jonë e re për punësim. Së dyti, trajtimi i rasteve të familjeve të dala nga ndihma ekonomike dhe integrimi i tyre në tregun e punës. E gjitha politika e punësimit, shkon në finale drejt reduktimit të varfërisë. Në 2012, ishte kulmi i varfërisë dhe papunësisë. Si dilet nga kjo gjendje? Dilet duke adresuar fenomenet e varfërisë dhe jo duke i vizituar këto familje.”
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.