Fatkeqësitë natyrore – Në pesë muaj, vetëm 1.4 euro prime sigurimi për frymë
Rreziku i fatkeqësive natyrore është i prekshëm në çdo kohë dhe bëhet aktual në sezone të veçanta të vitit.
Në verë kemi një frekuencë të shtuar të zjarreve, fenomen që ka prekur gjerësisht Shqipërinë edhe këtë vit.
Pavarësisht se çdo vit zjarret, përmbytjet apo fatkeqësi të tjera natyrore shkaktojnë dëme serioze ekonomike, ende sigurimi kundrejt këtyre dëmeve është në vlera të papërfillshme.
Sipas Autoritetit të Mbikëqyrjes Financiare, për pesë muajt e parë të vitit, shqiptarët kanë paguar prime sigurimi ndaj zjarrit dhe fatkeqësive natyrore për vetëm 550 milionë lekë ose rreth 4.1 milionë euro.
Mesatarisht, kjo përkthehet në prim sigurimi për frymë në vlerën e 1.4 eurove. Kjo shifër dëshmon qartë se sa pak shoqëria shqiptare shpenzon për t’u siguruar ndaj këtyre rreziqeve.
Ndërgjegjësimi i dobët rreth rëndësisë së sigurimit ndaj fatkeqësive natyrore ka bërë që Autoriteti i Mbikëqyrjes Financiare, me konsulencën e Bankës Botërore, të përgatisë një projektligj për sigurimin e detyrueshëm të pronave nga fatkeqësitë natyrore.
Procedurat për miratimin e këtij projektligji ende nuk kanë nisur, megjithatë, në mungesë të ndërgjegjësimit, duket se institucionet do ta kërkojnë zgjidhjen te sigurimi i detyrueshëm, edhe për pronat.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.