Fatura e “kripur” e importit të energjisë – Në 2 muaj, 68 milionë euro. Çmimet për shkurtin kanë tendencë rënie!

Rreth 35.4 mln euro u shpenzuan për blerjen e energjisë, me qëllim plotësimin e nevojave konsumatore gjatë muajit shkurt. Shuma është shpenzuar nga Korporata Elektroenergjitike Shqiptare, pasi sipas vendimit të qeverisë, që u miratua në datën 21 dhjetor 2021 është pikërisht kjo kompani që kryen procedurat e blerjes, që më herët kryheshin nga Furnizuesi i Tregut të Lirë, që është pjesë e OSHEE Group.

Sipas të dhënave të përpunuara nga TV SCAN, çmimi mesatar me të cilin është blerë energjia arrin në 204.5 euro/mwh, duke shënuar rënie në raport me muajin janar, ku energjia u sigurua me një çmim mesatar pre 240.3 euro/mwh.  Vlera për blerjen e energjisë për muajin shkurt është më e lartë se ajo e muajit janar, ku KESH shpenzoi 32.6 mln euro.

Në total, për 2 muajt e parë të vitit fatura për importin e  energjisë ka arritur në 68 mln euro. Ajo që bie në sy është një tendencë në rënie e çmimeve, me të cilin është blerë energjia gjatë muajit shkurt, në raport jo vetëm me janari, por edhe muajt e fundit të vitit 2021. Aktualisht, vendi ynë është i varur thuajse tërësisht nga burimet ujore të energjisë, duke u ndikuar tërësisht nga kushtet atmosferike.

Ndërkohë që, kjo panoramë do të ishte ndryshe, nëse do të ishte shfrytëzuar potenciali i lartë i diellit dhe i erës që ka vendi ynë, çka do të diversifikonte burimet e prodhimit të energjisë, duke ulur ndjeshëm edhe faturën e importit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.