Fatura për dëmet e tërmetit – Tenderë për riparim banesash, për 21 shtatorin qeveria ka dhënë 457.8 milionë lekë

Qeveria Shqiptare ka dhënë për tërmetin e 21 shtatorit rreth 457.8 mln lekë për rikonstruksion dëmi në banesa, në Qarqet Durrës dhe Tiranë. Të dhënat janë përpunuara nga Open Data Albania,  që gjithashtu bën me dije se çelja e fondit dhe kontraktimi me negocim zgjati rreth 2 muaj. Njoftimi i Fituesit është bërë në datën 25 nëntor, ndërsa kontrata nuk është lidhur ende.

Sipas ODA-s, dokumenti i tenderit flet për riparim dëmi, ndërsa nuk është e qartë nëse ka fond tjetër për strehim për rastet e banesave totalisht të pabanueshme dhe të parikonstruksushme pas tërmetit të 21 shtatorit. Ndërkaq, sa i takon procedurës tenderuese, negocimet janë bërë të ndara në katër lote, ndërsa  kontraktimi është bërë nga Ministria e Mbrojtjes si dikaster përgjegjës për emergjencat civile.

Referuar listës, që shoqëron njoftimin, në total janë rreth 235 banesa që janë parashikuar të riparohen, ndërkohë që përfundimi i punimeve duhet të kryhet brenda muajit dhjetor të këtij viti. Sa i takon burimit të financimit, një pjesë e tyre është mbuluara nga Fondet Financiare në Dispozicion të Ministrisë së Mbrojtjes, në Programin buxhetor Emergjencat Civile, ndërkohë që pjesa tjetër janë fonde të shtuara në Dispozicion të Këshillit të Ministrave në Programin buxhetor Emergjencat Civile për viti 2019 prej 500 000 000 lekësh nga fondi i rezervave të buxhetit të shtetit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.