Fatura të larta për blerje energjie – SHIFRAT/ Për vitin 2020 janë shpenzuar mbi 77 milion euro

Mbi 77 mln euro ka shpenzuar Furnizuesi i Tregut të Lirë për blerjen e energjisë elektrike përgjatë këtij viti. 60.1 mln euro u shpenzuan për periudhën janar-gusht, sipas të dhënave të raportuara nga Enti Rregullator i Energjisë, ndërkohë që pjesa tjetër  i takon energjisë së blerë për muajin shtator dhe 15 ditëshin e parë të tetorit.

Kjo pasi, sipas të dhënave zyrtare, gjatë muajit shtator u shpenzuan  14.1 mln euro për plotësimin e nevojave konsumatore, ndërkohë që 3 mln euro të tjerë janë shpenzuar deri më tani për tetorin. Për 8-mujorin, çmimi mesatar me të cilin u ble energjia arriti në 47.17 euro/ mwh, ndërkohë që për shtatorim çmimi pësoi një rritje të ndjeshme, duke arritur në  59.87 euro/mwh.  Faturat e kripura reflektojnë uljen e prodhimit të energjisë për shkak të situatës jo të favorshme hidrike, ndërsa nxjerrin edhe një herë në pah nevojën që ka vendi ynë për diversifikimin e burimeve të prodhimit të energjisë.

Kjo pasi, aktualisht prodhimi është i varuar thuajse tërësisht nga uji, ndërkohë që potenciale të tjera sikurse është dielli apo era, mbeten në nivele shfrytëzimi tejet të ulët. Ndërkaq, kompania publike ka ulur ndjeshëm investimet ku për vititn 2020 plani arriti në 1.16 mld lekë, me një rënie të ndjeshme në raport me vitin 2019, ku vetëm  në 9-mujorin e parë u shpenzuan 2.95 mld lekë, teksa vlera totale e kontratave të lidhura arrinte në 3.75 mld lekë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.