Faturë “e kripur”, AMF: Siguruesit të paguajnë menjëherë 7 milionë euro
Autoriteti i Mbikëqyrjes Financiare ka urdhëruar Byronë Shqiptare të Sigurimeve të shlyejë në mënyrë të menjëhershme 923 milionë lekë ose afro 7 milionë euro dëme të mbartura në Fondin e Kompensimit.
Shuma e mësipërme përfshin dëme të ndodhura që nga viti 2001 deri në fund të vitit 2017, për të cilat ka përfunduar procesi i trajtimit ligjor, por nuk janë shlyer ende.
Sipas vlerësimit të AMF, vlera totale e dëmeve që duhen paguar nga fondi i kompensimit deri në fund të këtij viti do të jetë rreth 1.8 miliardë lekë ose rreth 13.5 milionë euro.
Veç shlyerjes së detyrimeve deri në fund të vitit 2017, AMF i ka kërkuar Byrosë së Sigurimeve që fondi i kompensimit për vitin 2018 të parashikohet në vlerën e 895 milionë lekëve, shumë kjo që përfshin vlerën e dëmeve që janë në proces trajtimi apo objekt çështjesh gjyqësore, si edhe një shumë në formë provigjioni për dëmet që do të ndodhin gjatë këtij viti.
Vendimi i marrë nga AMF tenton t’i japë fund problemeve disa vjeçare me shlyerjen e detyrimeve nga Fondi i Kompensimit.
Fondi i Kompensimit është përgjegjës për dëmet e shkaktuara nga mjetet e pasiguruara kundrejt palëve të treta. Më pas, Fondi ka të drejtë të kërkojë shlyerjen e dëmeve nga personat përgjegjës, duke hapur çështje gjyqësore.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.