Fauci i tërheq “veshin” amerikanëve: Bëhuni gati për “post – falënderimet”, rastet me COVID do të rriten me hapa gjigandë

Eksperti amerikan i sëmundjeve infektive, Anthony Fauci, ka parashikuar një rritje të madhe të rasteve të COVID – 19 në javët e ardhshme, pasi miliona amerikanë nuk dëgjuan paralajmërimet dhe udhëtuan në të gjithë vendin për festimet e Falënderimeve.

“Thuajse e sigurt që do të ketë impakt të madh në rastet me koronavirus, për shkak të asaj që ka ndodhur me udhëtimet” u shpreh Fauci për CNN.

Fauci paralajmëroi gjithashtu se mund të ketë shifra drastike në rritje për shkak të mungesës së distancimit social dhe të udhëtimeve, e që për më tepër, kjo situatë do të përkeqësohej në Krishtlindje.

Nga ana tjetër, duke folur për NBC, eksperti amerikan “iu lut” amerikanëve të mbanin maska, të qëndronin larg nga njëri – tjetri dhe të shmangnin grupimet e mëdha, për frenimin e përhapjes së virusit.

Po ashtu, koordinatorja e Shtëpisë së Bardhë, për çështjet e COVID – 19, Deborah Birx, riktheu në kujtesë se si gjatë një fundjave pushimesh në maj, infeksionet ishin rritur me hapa të mëdha. Po ashtu, Birx paralajmëroi se situata në vend tani është edhe më delikate.

“Tani po futemi në periudhën e Post – Falënderimeve me 3 – fish, 4 – fish, apo 10 herë më shumë raste me COVID kudo në vend. Jemi thellësisht të shqetësuar” u shpreh Birx  për CBC.

Paralajmërimet nga ekspertët përkuan me përmbysjen e papritur të një lëvizje nga kryetari i bashkisë së New York, Bill DeBlasio, i cili vendosi të rifillojë mësimin personal në sistemin më të madh shkollor të vendit vetëm 11 ditë pas mbylljes së shkollave për shkak të rritjes së rasteve të koronavirusit në qytet.

Në SHBA janë raportuar më shumë se 13 milionë raste të COVID-19, me mbi 266.000 vdekje, duke e bërë atë vendit më të goditur në botë nga pandemia.

Burimi origjinal: Deutsche Welle

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.