Fauci paralajmëron për Omicron – “Mund t’i shpëtojë imunitetit të vaksinave, apo të atyre që janë shëruar”
Eksperti i lartë i sëmundjeve infektive në Shtetet e Bashkuara, Anthony Fauci, paralajmëroi se varianti Omicron i koronavirusit është shumë i transmetueshëm dhe mund të penetrojë imunitetin ekzistues të vaksinave apo infeksionit të kaluar.
“Profili i mutacioneve sugjeron bindshëm se do të ketë avantazh në transmetueshmëri dhe mund të shmangë mbrojtjten imunitare që merret nga një antitrup monoklonal apo serum, pasi një person është infektuar dhe me shumë mundësi, edhe disa antitrupa të ofruar nga vaksina. Nuk do ndodh me doemos, por është një tregues i fortë dhe duhet të jemi të mirëpërgatitur”, u shpreh Fauci
Zbulimi i Omicron, i quajtur “variant shqetësus” javën e kaluar nga Organizata Botërore e Shëndetësisë, ka shkaktuar shumë shqetësime në botë se mund t’i rezistojë vaksinimeve dhe shtojë kohëzgjatjen e pandemisë, që ka tashmë 2 vite që ka nisur. Virusi, i zbuluar për herë të parë në Afrikën e Jugut, është identifikuar tashmë në Britani, Gjermani, Itali, Hollandë, Danimarkë, Belgjikë, Izrael, Australi dhe Hong Kong. Omicron është me shumë mundësi më i ngjitshëm se variantet e mëparshme, por ëhstë e paqartë nëse shkakton sëmundje më të fortë apo më të lehtë të Covid-19. Fauci tha se virusi nuk do të zhduket së shpejti dhe se vaksinat janë e vetmja mënyrë për të kontrolluar përhapjen.
“Kjo është një thirrje për veprim, që të lëmë mënjanë ndasitë që kemi dhe nëse nuk jemi të vaksinuar, ta bëjmë vaksinën, nëse nuk jemi vaksinuar plotësisht, të marrim dozat nxitëse si dhe të vaksinojmë fëmijët gjithashtu”, shtoi ai.
Omicron është shfaqur ndërkohë që shumë vende në Europë po luftojnë me rritjen e infeksioneve, me disa që kanë riaplikuar masa të karantinës. Varianti i ri ka hedhur gjithashtu drtië tek pabarazia e madhe e normave të vaksinimit në botë. Edhe pse shumë vende të zhvilluara po japin doza të treta, më pak se 7% e njerëzve në vendet e varfëra kanë marrë një dozë të parë të vaksinës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.