Fauci paralajmëron për variantin Delta / “Kërcënimi më i madh për të zhdukur virusin në SHBA”
Eksperti i Sëmundjeve infektive në Shtetet e Bashkuara, Anthony Fauci, tha se varianti delta i koronavirusit, i zbuluar për herë të parë në Indi, është kërcënimi më i madh i përpjekjes amerikane për të zhdukur Covid në kufijtë e veta.
“Transmetueshmëria është padyshim shumë më e madhe tek varianti delta”- tha Fauci, duke shtuar se kjo shoqërohet me një rritje të ashpërsisë së sëmundjes. Varianti delta po bëhet mbizotëruesi në botë, sipas një lajmërimi të Organizatës Botërore të Shëndetësisë së fundmi. Fauci tha se vaksinat e autorizuara në SHBA, përfshirë atë të Pfizer/BioNTech, janë efektive kundër varianti të ri të Covid-19. “T’i përdorim këto mjete për ta shkatërruar vatrën”- tha Fauci.
Shtetet e Bashkuara po dështojnë të arrijnë objektivin e vaksinimit të 70% të të rriturve deri më 4 korrik dhe do kenë nevojë për disa javë shtesë për ta arritur objektivin, sipas këshilluesit për Covid tek Shtëpia e Bardhe, Jeffrey Zients.
Më shumë se 150 milionë njerëz në SHBA, apo mbi 45% e popullsisë, janë vaksinuar plotësisht, sipas të dhënave të fundit federale.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.