Favorizim femrave në bujqësi. Ndryshojnë subvencionet, pikë shtesë në vlerësim
Skemat e subvencioneve të Ministrisë së Bujqësisë dhe fondet e Bashkimit Europian gjatë këtij viti do t’i japin prioritet dhe më shumë akses grave, duke i favorizuar me 10 pikë shtesë në momentin e vlerësimit të projekteve.
Këto masa synojnë fuqizimin e grave rurale, ku sipas të dhënave të aktualizuara, vetëm 7 për qind e sipërmarrjeve drejtohen nga gjinia femërore. Organizata Botërore për Ushqimin dhe Bujqësinë dhe UN Woman kanë nisur një projekt që synon fuqizimin e grave rurale, si element kyç për zhvillimin e qëndrueshëm të ekonomisë.
Përfaqësuesi i OKB në Shqipëri Brian Williams u shpreh “Gratë duhet të mbështeten përmes burimeve financiare, ato nuk marrin pjesën që u takon dhe ne duhet ti kushtojmë vëmendje specifike se ku shkojnë paratë nga autoritetet publikë. Jemi në hapat fillestarë të një koncepti që gratë në zonat rurale të bëhen pjesë e një ekonomie formale. Aksesi në shërbimi, fuqizimi i tyre do të rrisë aftësinë e tyre vetëvendosëse, duke marrë vendime jo si gratë e fermerëve, por si fermere”.
Nga ana tjetër përfaqësuesi i UN Woman në Shqipëri David Sounders pohoi “Fokusi ynë është që të rrisim aksesin në mbështetjen financiare të sipërmarrësve gra që bizneset e tyre të bëhen më konkurruese. Ky projekt që po përgatisim, do ti japë mbështetje grave në zonat rurale që të krijojnë biznese të qëndrueshme dhe për këtë do të ofrojmë modele që komuniteti rural të përgatitet mirë për të përdorur fondet IPA, fonde që do të rriten në vitet në vijim. Ne mendojmë se nuk ka rritje të qëndrueshme nëse ka barriera për gratë”.
Gjatë vitit që lamë pas numri i meshkujve përfitues nga fondet shtetërore dhe të BE ka qenë rreth 9 herë më i lartë se femrat.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.