Fed pranon se inflacioni ka kaluar objektivin – Blerjet e obligacioneve do të përfundojnë në Mars. Interesat rriten në 2022

Rezerva Federale, pasi bëri të ditur se objektivi i inflacionin është arritur, deklaroi se mund të përfundojë programin e blerjes së obligacionve të pandemisë në muajin Mars dhe të krijojë mundësinë për një rritje të normës bazë të interesit në vitin 2022, duke i dhënë fund politikave të krizës shëndetësore. Në projeksionet e reja ekonomike të publikuara pas takimit 2 ditorë të politikave,  zyrtarët parashikuan se inflacioni do të vazhdojë në 2.6% në vitin e ardhshëm, krahasuar me 2.2% që pritej në muajin Shtator, ndërkohë që norma e papunësisë do të bjerë në 3.5%, pranë punësimit të plotë.  Për rrjedhojë, zyrtarët projektuan se norma bazë e interesit do të duhet të rritet nga niveli aktual pranë zeros, në 0.9%, deri në fund të vitit 2022.  Kjo do të niste një cikël të rritjes së interesave, që do ta çojë nromën bazë në 1.6% në vitin 2023 dhe 2.1% në 2024-n, duke mos kaluar nivelet që konsiderohen si kufizuese ndaj aktivitetit ekonomik.

“Ne do shkurtojmë blerjet e obligacioneve më shpejtë, për shkak se me  presionet e inflacionit dhe me fuqizimin e tregut të punës, ekonomisë nuk i duhet më mbështetje e madhe politike. Ekonomia ka bërë progres të shpejtë drejt punësimit të plotë”, u shpreh Jerome Powell, Kryetari i Rezervës Federale.

Skenari i shpalosur nga banka qendrore është zbutja graduale e inflacionit në vitet e ardhshme, ndërkohë që papunësia qëndron e ulët dhe ekonomia vazhdon të rritet. Koha e rritjes së parë të interesave në vitin 2022, sipas bankës, do të varet kryesisht tek rrugëtimi i tregut të punës, që pritet të përmirësohet në muajt e ardhshëm. Inflacioni nuk u referua më si tranzitor, ndryshe nga takimet e mëparshme të bankës, ndërkohë që zyrtarët pranuan se rritja e çmimeve ka kaluar objektivin prej 2% për disa kohë.  Thuajse të gjithë 18 politikëbërësit treguan se të paktën 1 rritje e interesave do të jetë e përshtatshme përpara fundit të vitit 2022.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.