FED shtyn vendimin – Hedh poshtë shqetësimet për 3 mujorin e parë, siguron 2 ndërhyrje për 2017
Rezerva Federale në SHBA mbajti normën e interesit të pandryshuar në takimin e politikave monetare të muajit Maj. Politikëbërësit hodhën poshtë shqetësimet për tremujorin e parë, ku rritja shënoi 0.7%.
Fuqizimi i tregut të punës tregon se Banka do të vazhdojë me dy rritje të normës së interesit për vitin 2017. Në një deklaratë optimiste pas takimit dyditor, Rezerva Federale tregoi se shpenzimet konsumatore dhe investimet e bizneseve janë përmirësuar, ndërsa inflacioni po vazhdon t’i afrohet objektivit prej 2%. “Rritja e ngadaltë për tremujorin e parë është tranzitore”, deklaroi Komisioni Federal i Tregut të Hapur.
Në takimin e muajit Mars, Rezerva Federale rriti normën bazë të interesit me 25 pikë bazë në një segment prej 0.75-1%. Politikëbërësit e Sistemit Bankar Qendror në SHBA, ndryshe nga 2 vitet e kaluara, janë thuajse të sigurt për 2 rritje të normës bazë në 2017-ën. Konfirmimi i Rezervës Federale se plani për normalizimin e politikave monetare nuk ka devijuar, fuqizoi dollarin kundër shportës së valutave kryesore dhe rriti yieldet e titujve të thesarit.
Kundër jenit japonez, dollari u rrit nga 112.08 në 112.9 gjatë ditës së djeshme. Euro u tërhoq nga 1.0936 në 1.0882 kundër valutës së gjelbërt. Komisioni Federal i Tregut të Hapur po planifikon gjithashtu tkurrjen e bilancit të bankës prej 4.5 trilionë dollarë më vonë gjatë vitit. Takimi i radhës do të nisë më datë 13 Qershor dhe pritshmëritë e tregjeve për një ndërhyrje në këtë datë janë rritur në 0.75%, tregojnë analistët e Wells Fargo.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.