Fed ul përsëri interesat – Sinjalizon mbajtjen e normës bazë të interesit në 1.5-1.75%
Rezerva Federale në Shtetet e Bashkuara uli normën bazë të interesit për të tretën herë këtë vit, për të mbështetur rritjen ekonomike ndërkohë që shumë vende në botën e zhvilluar po tregojnë ngadalësim.
Megjithatë, institucioni bëri të ditur se nuk do të ketë më ulje të interesave, vetëm nëse ekonomia nis rënien e shpejtë. Norma bazë e interesit u ul me 25 pikë bazë në segmentin 1.5-1.75%. Kryetari i sistemi bankar qendror, Jerome Powell, tha në konferencën pas takimit, se politikat monetare ndodhen në vendin e duhur.
“Sot ne vendosën për të ulur normën bazë të interesit për të tretën herë gjatë vitit. E morëm këtë vendim për të ruajtur fuqizimin e ekonomisë amerikane përballë ngadalësimit botëror. Lëvizjet politike që kemi ndërmarrë që prej vitit të kaluar po ofrojnë mbështetje për ekonominë. Ne mendojmë se politikat monetare ndodhen në vendin e duhur”, është shprehur Jerome Powell, Kryetari i FED
Deklarata e Powell bie ndesh me kërkesat e presidentit Donald Trump, për ulje të mëtejshme të interesave për të nxitur ekonominë, që regjistroi një normë prej 1.9% në tremujorin e tretë, poshtë premtimeve për 3% të Donald Trump.
Në konferencën pas takimit të bankës qendrore, Powell përmendi disa arsye se pse mendon që ekonomia po performon mirë dhe pritet të vazhdojë e tillë. Ai theksoi shpenzimet konsumatore, shitjen e shtëpive dhe çmimet e aksioneve, që ndodhen në rritje të fortë, por jo të ekzagjeruar.
Sipas Rezervës Federale, disa rreziqe që i kanoseshin Shteteve të Bashkuara dhe të gjithë botës, duket se janë zbehur së fundmi. Powell tha se lufta tregtare me kinën ndodhet një hap pranë rezolutës dhe gjasat që Britania të dalë pa marrëveshje nga Europa janë reduktuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.