“Fëmijët me aftësi ndryshe, në harresë”. Pampuri, akuza në prag të vitit shkollor. Shahini: Gjithëpërfshirja është prioritet

Partia Demokratike ka akuzuar qeverinë se në prag në nisjes së procesit mësimor, ka lënë totalisht në harresë fëmijët me nevoja të veçanta dhe aftësi ndryshe. Përmes një postimi në rrjetet sociale, ish-deputetja Orjola Pampuri tha se për këtë kategori fëmijësh, nuk ka një plan për transportimin në shkolla; kushtet e distancimit fizik apo marrjen e masave higjienike.

Ne dimë nga raportet e dhëna  e organizmave që veprojnë në Shqipëri, se mundësitë e arsimit për këta fëmijë janë tejet shqetësuese.  Shpenzimet për sigurimin e një arsimi cilësor për fëmijët në nevojë janë planifikuar më të ulta se shpenzimet faktike të vitit 2015 për të gjithë periudhën 2018-2020.

Po ashtu, Pampuri tha se mësuesit ndihmës nuk kanë përgatitjen e duhur, sipas kurrikulave specifike që të mundësojnë marrjen e njohurive, aftësive dhe kompetencave profesionale për integrimin e fëmijëve me aftësi ndryshe në komunitetin e një klase të zakonshme. Përgjija për Pampurin ka ardhur nga ministrja e Arsimit, Besa Shahini përmes një postimi në rrejtet sociale.

“Gjithëpërfshirja është dhe do të mbetet prioritet madhor i Ministrisë së Arsimit, Sportit dhe Rinisë. Në këtë kuadër, kemi ecur më tej duke licencuar për herë të parë mësuesin ndihmës në profilin “Arsim Special”, sepse besojmë fuqishëm se mësuesit ndihmës të mirë-përgatitur janë shtyllë bazë në avancimin e këtij prioriteti”

Sipas ministrisë, aktualisht në sistemin arsimor parauniversitar janë rreth 1,090 mësues ndihmës.

Ola Mitre / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.