Fëmijët me aftësi të kufizuar – World Vision, ofron shërbime falas për 470 vogëlushë
Rreth 470 fëmijë më aftësi të kufizuara në qytetin e Librazhdit do të përfitojnë vizita dhe shërbime falas.
Organizata humanitare World Vision ka nisur në këtë qytet fazën e parë të programit social “Tungjatjeta…jetë”, program i cili ofron çdo shërbim për fëmijët me aftësi të kufizuara pranë banesave ku ata jetojnë.
Njësia Komunitare Lëvizëse e përbërë nga dy punonjës socialë, një psikolog, një infermier, një fizioterapist dhe një logopedist me kohë të pjesshme, do të udhëtojë drejt zonave më të thella të Librazhdit.
Ekipi i ekspertëve do të hartojë plane individuale zhvillimi për çdo fëmijë dhe do i ndjekë ato hap pas hapi.
Ndërkohë që studimi i parë kombëtar mbi prevalencën e aftësisë së kufizuar tregoi se në Shqipëri ka 70 mijë fëmijë me aftësi të kufizuara .
“Tungjatjeta…jetë” përmes njësisë lëvizëse do të ofrojë edhe konsultime për kujdestarët ligjorë, familjarët dhe anëtarët e komunitetit ku fëmija jeton.
Kjo organizatë kërkon mbështetje financiare për këtë nismë jo vetëm në Librazhd, por në të gjithë Shqipërinë. World Vision është një organizatë humanitare, e cila ka nisur veprimtarinë e saj në Shqipëri në vitin 1999 dhe vepron aktualisht në 100 vende.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.